مقبوضہ کشمیر؛ملٹری آپریشن میں جاسوس کتا اور بھارتی فوج کے 2 اہلکار ہلاک

 سری نگر: مقبوضہ جموں و کشمیر کے ضلع راجوری میں ہونے والے بھارتی فوج کا ملٹری آپریشن ناکام ہوگیا جس کے دوران تربیت یافتہ جاسوس کتا اور 2 اہلکار مارے گئے۔ 

بھارتی میڈیا کے مطابق مقبوضہ کشمیر کے ضلو راجوری میں خفیہ اطلاعات کی بنیاد پر اعلیٰ سطح کا سرچ آپریشن کیا گیا جس کے دوران ایک گھر میں چھپے ہوئے مسلح افراد نے بھارتی فوج پر فائرنگ کردی۔

فائرنگ میں بھارتی فوج کا اہلکار موقع پر ہلاک ہوگیا جب کہ تین کو شدید زخمی حالت میں اسپتال منتقل کیا گیا جہاں ایک اہلکار نے زخموں کی تاب نہ لاتے ہوئے دم توڑ دیا۔

اسپتال میں دم توڑنے والا اہلکار اسپیشل فورس میں تعینات تھا۔ بقیہ دو زخمیوں کی حالت بھی تشویشناک بتائی جا رہی ہے جب کہ فائرنگ میں بھارتی فوج کا تربیت یافتہ کتا بھی مارا گیا۔

کشمیر پولیس نے دعویٰ کیا ہے کہ اس سرچ آپریشن کے دوران ایک عسکریت پسند بھی بھارتی فوج کی فائرنگ میں ہلاک ہوا جس کا تعلق پاکستان سے ہے تاہم اس کا ثبوت پیش کرنے میں ناکام نہیں۔

یہ پہلی بار نہیں جب بھارت نے اپنی فوج کی کمزوریوں اور کوتاہیوں کا ملبہ پاکستان پر ڈالنے کی کوشش کی ہے۔ اس سے قبل پلواما خودکش دھماکے میں بھی پاکسےان کو ملوث کرنے کی کوشش کی گئی تھی۔

تاہم بھارت عالمی قوتوں کو پاکستان کے خلاف کسی بھی قسم کا ثبوت پیش کرنے میں ناکام رہا ہے جس پر اسے عالمی سطح پر ہزیمت بھی اُٹھانا پڑتی ہے۔