کراچی میں فائرنگ سے معروف عالم دین جاں بحق

  کراچی: گلستان جوہر میں جامعہ ابوبکر اسلامیہ کے مہتمم مولانا ضیاء الرحمان کو ٹارگٹ کرکے قتل کردیا گیا۔

ایکسپریس نیوز کے مطابق شاہراہ فیصل تھانے کی حدود گلستان جوہر بلاک 16 میں مسلح موٹر سائیکل سواروں نے فائرنگ کرکے جامعہ ابوبکر اسلامیہ کے مہتمم مولانا ضیاء الرحمن کو قتل کردیا۔

اے ایس پی ظفر چھانگا کے مطابق مولانا ضیاء الرحمان گلستان جوہر میں ایف بی آر بلڈنگ کے سامنے پارک میں چہل قدمی کررہے تھے کہ نامعلوم موٹر سائیکل سواروں نے ٹارگٹ کرکے قتل کیا۔

اے ایس پی کے مطابق مولانا ضیاء الرحمان کو تین سے چار گولیاں ماری گئیں جس سے وہ موقع پر جاں بحق ہوگئے۔ اُن سے موبائل فون یا نقدی وغیرہ بھی نہیں چھینی گئی۔

پولیس کو جائے وقوعہ سے پستول کے دو خول ملے ہیں جبکہ اطراف کی سی سی ٹی وی فوٹیجز کا بھی جائزہ لیا جارہا ہے۔ آئی جی سندھ رفعت مختار نے واقعے کا نوٹس لیکر ایس ایس پی ایسٹ سے تفصیلات طلب کرلی ہیں۔

دریں اثنا ایس ایس پی ایسٹ عرفان بہادر کا کہنا ہے کہ جائے وقوعہ سے 11 خول ملے ہیں، چار خول نائن ایم ایم پستول اور سات خول تیس بور پستول کے ملے ہیں۔

ایس ایس پی عرفان بہادر کے مطابق عینی شاہدین کا کہنا ہے کہ دو موٹر سائیکل پر سوار ملزمان نے اندھا دھند فائرنگ کی،  اطراف میں موجود سی سی ٹی وی کیمروں کی نشاندہی کرلی گئی ہے امید ہے کیمروں سے ٹارگٹ کلرز کی شناخت ممکن ہوجائے گی۔