گیس کی قیمت میں اضافہ غریب کے منہ سے نوالا چھین لے گا، تاجر رہنما

 اسلام آباد: آل پاکستان انجمن تاجراں اور ٹریڈرز ایکشن کمیٹی اسلام آباد کے صدر اجمل بلوچ نے کہا ہے کہ بجلی، پٹرول اور ڈالر کی قیمت میں اضافہ سے ملک میں ریکارڈ مہنگائی کا طوفان جاری ہے۔

اجمل بلوچ،سیکرٹری و کنونیئر ٹریڈرز کمیٹی آئی سی سی آئی خالد چوہدری،جناح سپر مارکیٹ کے صدر اسد عزیز – آب پارہ مارکیٹ کے جنرل سیکرٹری و ایگزیکٹو ممبر اختر عباسی اور سٹیل مارکیٹ کے صدر عرفان چوہدری نے مشترکہ بیان میں کہا کہ کاروبار سکڑ گئے ہیں اور ظالمانہ بجلی کے بلوں کی وجہ سے تاجر اور دکاندار ڈیفالٹ کر رہے ہیں ان حالات میں گیس کی قیمت میں مجوزہ ساٹھ فی صد اضافہ غریب کے منہ سے روٹی کا نوالا چھیننے کے مترادف ہوگا۔

ان کا کہنا تھا کہ روٹی کی قیمت میں پچاس فی صد تک اضافہ ہوگامہنگائی بڑھانے کی ذمہ داری حکومت کی ھے پیٹرول اور بجلی کی قیمت میں اضافہ حکومت نےکیا ،ڈالر مہنگا حکومت نے کیا،بجلی کے بلوں میں آٹھ قسم کے ٹیکس بھی حکومت نے لگائے ہیں کاروبار کم از کم تیس فی صد تک سکڑ چکے ہیں.

انہوں نے کہا کہ اگر یہی حالات رہے تو کاروبار بند ہو جائیں گے تاجروں کو منافع خور اور ذخیرہ انداز کہنا سخت زیادتی ہے ، ٹی وی شوز میں تاجروں کو برا بھلا کہنا بند کیا جائےحکومت بجلی اور پیٹرول کی قیمت میں فوری طور پر کمی کرے ۔

انہوں نے مزید کہا کہ وزیر اعظم کی طرف سے ریلیف مہیا کرنے کا وعدہ بھی جھوٹ ثابت ہوا ہےگیس کی قیمت میں اضافہ کا فیصلہ واپس لیا جائے –